Ang Paglisan

Kasabay ng samyo ng hangin mula sa silangan
Paghihintay ng pusong lubos ng nahihirapan
Ang iyong pagdating na wala, walang katiyakan
Tinangay ng matinding ihip patungong kanluran
Noo'y ikaw at ako sa dulo ng walang hanggan
Ang pagmamahal na dati nating pinagsaluhan
Pag-ibig pa rin kayang ma'tuturing ang ugnayan
kung isa na lang, hindi na 'tayo' ang lumalaban
Lahat ng nasimulan nagkar'on ng katapusan
Ang dating walang hanggan, nagkaroon ng hangganan
Dalawang mumunting letra lamang ang kinailangan
Upang ang naipon at pinalago'y matuldokan.
Puso'y nagdurusa, naghihimutok, nasasaktan
Paulit-ulit na tanong, "Ba't mo ako nilisan?"
Nangakong magmamahalan hanggang sa kamatayan
Subalit kamatayan mo ang aking kamatayan.