အလိုလိုက်မိခြင်းများ ဆင်ခြင်မယ်

အလိုလိုက်ခြင်း

မိဘဆိုတာသားသမီးကို အမြဲစိတ်ချမ်းသာအောင်၊ ပြည့်စုံအောင် ထားချင်တာ သဘာဝပါပဲ ဆိုရင် ငြင်းလို့မရပါဘူး။ ဒါပေမယ့် တစ်ချို့နေရာတွေမှာ မိဘက သားသမီးကို ချစ်လွန်းလို့ဆိုပြီး အလိုလိုက်လွန်းအားကြီးရင်လည်း သားသမီးကို ချစ်တာထက် နှစ်ရာကျသွားမှာကိုလည်း သတိပြုရပါမယ်။ ကလေးတွေမှာ ငယ်ငယ်ကတည်းက ဗီဇ ဆိုတာရှိတယ် အဲဒီဗီဇကို အကျင့်ဆိုတာလေးနဲ့ ကျွန်တော်တို့အုပ်ထိန်းသူတွေက ပြုစုပျိုးထောင်ပေးကြရမယ် ဒါမှသာ ကလေးရဲ့နောင်တစ်ချိန် အနာဂါတ်မှာ မဖြစ်သင့်တာတွေ မဖြစ်ရအောင် စဉ်းစားဆုံးဖြတ်နိုင်စွမ်းလေးပါသွားမှာ ဖြစ်ပါတယ်။ ဥပမာပေးရရင် အချိုရည်ကြိုက်တဲ့ကလေးတစ်ယောက်ကို သူပူဆာတိုင်း အချိုရည်တွေ နေ့စဉ် တိုက်ခဲ့မယ်ဆို ရင် ကလေးအတွက် ဆီးချို၊ ပန်းနာ ရင်ကြပ် စတဲ့ရောဂါတွေ ငယ်ငယ်ရွယ်ရွယ်နဲ့.မဖြစ်သင့်ပဲ ခံစားနေရတာကိုမြင်ရမှာ ဖြစ်ပါတယ်။ ဒါ့ကြောင့် အသေးအမွှားလေးပေမယ့်လည်း အုပ်ထိန်းသူတွေအနေနဲ့ဂရုစိုက်ပေးဖို့လိုပါမယ်။ ကျွန်တော့ပတ်ဝန်းကျင်မှာ ကောင်လေးတစ်ယောက်ရှိတယ်ဗျ သူ့မိဘတွေကအရမ်းအလုပ်များကြတယ် အဲဒီတော့ ကလေးကို သူ့အဘွားကထိန်းရတယ် အဘွားဆိုတော့ အရမ်းကိုအလိုလိုက်တယ် သူ့မြေးလိုချင်တာ ဖြစ်ချင်တာဆိုရင် ချက်ခြင်းဖြည့်ဆည်းပေးတယ်။ တစ်ဖြည်းဖြည်းနဲ့ ဘယ်လိုဖြစ်လာလဲဆိုတော့ အမေ၊ အဖေ က ဆုံးမရင်တောင် အဘွားက လက်မခံဘူး သားအချစ် မြေးအနှစ်ဆိုတာ နေမှာပေါ့။ လူကြီးတွေက စရင်နောက်ရင် ကလေးက တံတွေးနဲ့ထွေးတယ် အဲလိုရိုင်းတဲ့အကျင့်လည်း မလုပ်နဲ့လို့ မဆုံးမဘူး ကလေးပဲ ဘာသိမှာလဲဆိုပြီးတော့ လွှတ်ထားတယ်။ အကြောင်းတစ်ခုခုကြောင့် ကလေးကို မိဘက ဆုံးမရင်တောင် အရင်ဆုံး အဘွားဖြစ်သူနဲ့ ရန်ဖြစ်ရတယ်။ သူများကလေးတွေ တစ်နေ့ မုန့်ဖိုး 200 ပေးတဲ့အချိန်မှာ အဘွားဖြစ်သူက သူ့မြေးကို တစ်နေ့ 500 ပေးတယ်။ အဲလိုနဲ့ တဖြည်းဖြည်းဆိုးသွမ်းလာရင်းနဲ့. အရွယ်ရောက်လာကာ အပေါင်းအသင်းမှားတော့ လူငယ်ပြုပြင်ထိန်းသိမ်း ရေးစခန်းမှာ နေနေရတာတွေ့ရတယ်။သူ့ကိုအလိုလိုက်တဲ့ သူ့အဘွားကတော့ ကောင်းရာမွန်ရာဘ၀ကနေ နောင်တရနေမလားတော့မသိ။ မိဘကမျှော်မှန်းထားတဲ့ ပန်းတိုင်လည်းသူမရောက်လိုက်ပါဘူး။ သတင်းစာကြော်ငြာထဲမှာပါတဲ့ အမွေပြတ်စွန့်လွှတ်ခြင်းဆိုတဲ့ ခေါင်းစဉ်လေးမှာတော့ စိတ်မကောင်းခြင်းများစွာနဲ့ သူ့နာမည်လေး တွေ့လိုက်ရပါတယ်။ ဒါ့ကြောင့် ကျွန်တော်တို့ကိုယ်တိုင် အုပ်ထိန်းသူနေရာရောက်လာတဲ့ အချိန်မှာ ဒီလိုအချက်လေးတွေ သတိထားပြီး ထိန်းကျောင်းပေးဖို့လိုပါတယ်။ ပြီးတော့ ‘’အလိုလိုက်လို့ အမိုက်စော်ကား’’ ဆိုတဲ့ စကားပုံလည်းရှိသားလားဗျာ။မိဘကို နင်ပဲငဆ ပြန်ပြော၊ ပြန်ဆဲ အိမ်ထဲမှာမူးနေတဲ့အဖေကို အပြင်ကနေ သားဖြစ်သူက ငါတစ်လုံး နဲ့ ကိုင်တုတ်လို့ စိန်ခေါ်နေတာကိုလဲ အံ့သြစွာ တွေ့ခဲ့ရဖူးပါတယ်။

သမီးမိန်းကလေး တွေ မွေးထားတဲ့တစ်ချို့မိဘတွေ အရွယ်မတိုင်ခင် အိမ်ထောင်ကျသွားတဲ့အခါ စေ့စပ်ပွဲမှာ ကြိတ်မနိုင်ခဲမရနဲ့ မျက်ရည်တွေဝဲကာ ‘’ငါ့သမီးလေးက အသက် မပြည့်သေးဘူးကွ’’ ဆိုတဲ့ စကားကို မျက်ရည်ဝဲကာ မချိတင်ကဲ ပြောတာကိုလည်းရင်နာနာနဲ့ ကြားဖူးပါတယ်။ အဲဒီအချိန်မှာ သူအလိုလိုက်ခဲ့တာတွေ ယုံကြည်ခဲ့တာတွေကို ပြန်ပြောင်းနောင်တရနေပါတော့တယ်။ အခုအချိန်မှတော့ လက်မခံလို့မရတော့ဘူးလေ။ နောက်တစ်ချက် ‘’သားသမီးယုံတော့ စုံလုံးကန်း’’ ဆိုတဲ့ အဖြစ်မျိုးမရောက်စေချင်ပါ။ အခုခေတ်က ဆယ်ကျော်သက်တွေအတွက် ပျက်စီးနိုင်စရာ လမ်းစ တွေ ပိုများနေတာကိုတွေ့ရပါမယ်။ ကျွန်တော်တို့ငယ်စဉ်ကလေးဘ၀ မှာ ဖုန်းဆိုတာ ပွဲရုံက ဦးလေးကြီး လက်ညှိုးကြီးနဲ့ အပေါက်လေးတွေကို လှည့်လို့ဆက်တာကိုပဲ မြင်ဖူးခဲ့ရတာ။ အခုခေတ်မှာတော့ ဖုန်းဆိုတာ ကလေးတိုင်းကိုင်နိုင်နေပြီ ဇယ်တောက်ခဲ့တဲ့လက်တွေအစား Tablet ဆိုတာဆော့တဲ့လက်တွေဖြစ်ကုန်ကြပြီ။ အဖြူအစိမ်းနဲ့ စာသင်ချိန်မှာ Live လွှင့်ပြီးကစားတဲ့ခေတ်ရောက်ပြီ။ ဒီလိုအဖြစ်တွေကြားထဲမှာ ရင်ကျိုးခဲ့ရတဲ့မိဘတွေ နည်းမည်တော့ မထင်ပါ။

သေချာစမ်းစစ်ကြည့်ပါ ငယ်စဉ်ကတည်းက အလေ့အကျင့်ကောင်းလေးတွေ နဲ့ စည်းကမ်းတကျ ကြီးပြင်းလာတဲ့ကလေး မိမိသူငယ်ချင်းသော်လည်းကောင်း မိမိကိုယ်တိုင်သော်လည်းကောင်း ဖြစ်နိုင်ပါတယ် အတောင်စုံလို့ ပျံကြပြီဆိုရင်ဖြင့် စည်းလွတ်ဝါးလွတ်တော့ မဆိုးသွမ်းနိုင်တာကိုတွေ့ရမယ် အရာရာကို စဉ်းစားတွေးခေါ်ပြီး မှန်ကန်တဲ့ဆုံးဖြတ်ချက်တွေချနိုင်တာကိုတွေ့ရမယ်။ ဒါတွေဟာ ကျွန်တော်တို့မိဘတွေကို ကျွန်တော်တို့ကို ပြုစုပျိုးထောင်ပေးရာမှာ မှန်ကန်တဲ့နည်းလမ်းများစွာက အထောက်အကူပြုနေခဲ့တာပါ။ ရင်ထဲမှ လှိုက်လှဲစွာ ကျေးဇူးတင်မိပါသည်။ ထို့ကြောင့် မိမိတို့ကိုယ်တိုင် မိဘ၊ အုပ်ထိမ်းသူနေရာသို့ရောက်လာသောအခါ မှန်ကန်သော အကျင့်အကောင်း၊ စည်းကမ်းလေးများ ဖြင့် အလိုလိုက်ခြင်းအား စနစ်တကျ ထိန်းသိမ်းပြုစုပျိုးထောင်ပေး နိုင်ပါရန် လေးစားစွာ အကြံပေး ရေးသားအပ်ပါသည်။

Author by
@htinyarsai(4:22 pm)
MSC_203