Mga Hulagway sa Kagahapon

Image Source

Matud pa sa pinulungan ang mga hulagway ug litrato adunay daghang ipasabot sa mga magasud-ong niini. Pinaagi sa mga hulagway, makabaton ang usa ka tawo sa panabot kung unsa ang mga nagapanghitabo sa palibot karon ug sa kaniadtong panahon. Kini mamahimong giya alang sa mga umaabot nga mga henerasyon.

Matag panimalay adunay mga tinipigan nga mga hulagway. Hulagway sa mga nagkalain-laing mga panghitabo sa ilang panimalay. Kasagaran nga dili nato mapakyas nga makit-an mao ang mga hulagway niadtong panahon nga gikasal si mama ug papa. Ang mga anak nga magsud-ong niini malingaw gayud pag-ayo tungod kay makita man nila ang ilang mga ginikanan sa panahon sa ilang kabatan-on.

Pinaagi sa maong mga hulagway, magsugod dayon ang estorya kung sa unsang paagi nagkatagbo ang mga dalan sa atong mga ginikanan. Sa unsang paagi nagkahimamat ang ilang mga pagbati ug sa unsa paagi nangimoral sa ang tatay kay nanay. Dili lang sa kalingawan, mamahimo pud kaning hinungdan sa pagtudlo sa maayong pamatasan kay mapakita man nila kung unsa ang ilang mga kapaagihan nga gigamit kaniadtong panahona.

Image Source

Pag-abli sa laing album, makita nila ang unang pinuy-anan sa ilang mga ginikanan kung unsa kini kaanindot ug unsa usab ka bati :). Pinaagi niini mapabati nato sa atong mga anak nga balay mamahimong maanindot pinaagi sa mga taong namuyo sulod niini. Ang mga maayong pagtagad sa usa ug usa lakip na ang ilang mga pamatasan mao magahatag ug mamaayong hulagway sa usa ka panimalay.

Bisan pa ug unsa kaanindot ug bungga ang usa ka panimalay kung bati naman ug mga kinaiya ang mga nagapuyo sulod niini. Samok kaayo, kanunay lang nag-away ang mga anak lakip na ang mga ginikanan, BATI gyud kini ug hulagway. Matingala na lang ka naunsa nang panimalaya nga adunahan man unta apan bati man ilang balay. Mao ni siya ang hinungdan.

Image Source

Ang Kalidad sa Hulagway

Apan aduna ba kamoy namatikdan sa mga karaan nga hulagway ug sa mga bag-ong hulagway? Ang pangutana, nakakita na ba kaha pud ka ug karaan nga hulagway sa inyong pamilya, basin wala pud. Ang karaan nga mga hulagway itum ug puti lang ang hitsura, dili sama sa atong mga hulagway karong panahona nga de kolor na. Kung de kolor ang mga hulagway sa inyong panimalay, kana timailhan nga wala pa ka nakakita ug karaang hulagway.

Na hala kung mao, laag sa kadyot sa ilang lolo ug lola nimo ug tanawa ang ilang mga koleksyon sa mga hulagway. Sigurado ko nga makakita gyud ka ug karaan nga hulagway. Ang pinaka-karaan nga hulagway naay dili kaayo nato makita ang itum tungod kay grey kini siya. Ang black & white man gud, expression lang kini sa mga butang labi na sa mga hulagway nga dili de kolor.

Karon, nakakita na gyud ka. Kung nabantayan ninyo ang kalidad sa maong hulagway lahi ra gyud kaayo sa bag-o nga panahon. Bisan sa pipila na ka anyo kini nga gitipigan, nindot lang gihapon kini tanawon. Gawas sa hitsura sa maong mga hulagway, ang iya usab nga papel lahi ra kaayo, dili sa sama sa karon. Nano man nga imbis wala pa kaayoy teknolohiya kaniadto, mas nindot man hinoon ang kalidad kompara sa karong panahona nga grabe na ka high-tech ang teknolohiya?

Image Source

Ayaw Kalimot Sa Paghulagway

Nasayod kitang tanan nga aduna pay mga henerasyon sa atong mga pamilya ang moabot sa panahon nga wala nata niining kalibutana. Ayaw gyud mo kalimot pag dokumento sa mga panghitabo sa inyong kinabuhi karon pinaagi sa paghulagway aron sa umaabot nga panahon aduna usay mga hulagway nga ilang makita nga makasaysay sa mga panghitabo. Pinaagi niini mahinumduman ug mailhan paka sa imong mga kaapuhan puhon.

Dili sama kaniadto, sayon ra kaayo ang pagbaton ug hulagway karon. Kung sauna, kinahanglan pa ka mangita ug tawo nga mo hulagway kanimo o kinahanglan pa moadto sa studyo aron lang makapahulagway, karon dali ra kaayo. Litrato diri, litrato didto, bisan unsa na lang ang porma, bisag wala sa porma basta kay feel nako magpahulagway, hala tira. Selfie diri, selfie didto, makalingaw.

Ang bag-ong teknolohiya sama sa cellphone nagahatag kanato sa maayong higayon aron aduna kitay mabilin nga mga hulagway alang sa umaabot nga panahon. Apan adunay gamay nga bikil niining, gamay lang hinoon. Unsa man kini? Kaniadto ang mga litrato ginabutang ug album apan karon toa na sa, asa man? sa memory sa cellphone ug sa camera. Inig ka guba sa cellphone o sa memory, wala sab ang mga litrato.

Image Source

Wala nay halin ang mga mamaligyaay ug album ug wala na pud kaayoy kita ang mga maniniyot. Kung gusto nato nga masiguro pag-ayo nga ang atong mga litrato makaabot pa sa umaabot nga mga heneraston sa atong pamilya, tipigi kini ninyo pag-ayo. Kung dili na kamo ga paprint ug hardcopy, pero mas maayo gyud nga ipa print ninyo, labi katong mga maanindot gyud nga kuha.

Pwede pud ta mo palit ug mga digital album, aron padayon gihapon natong masunod ang gibuhat sa atong mga ginikanan kaniadto, ang pag display sa ilang mga album alang sa mga bisita. Pwede pud nato e upload sa mga image database website (english naman hinoon ni, paki bisaya lang ko).