"Pick a Word, Paint a Story #07"

کیسے ہیں آپ سب. امید کرتی ہوں کہ آپ سب ٹھیک ہوں گے اور میں بھی بالکل ٹھیک ہوں. سب سے پہلے میں میم @senehasa کا شکریہ ادا کرتی ہوں جنہوں نے یہ بہترین کانٹیسٹ پیش کیااور ہمیں اپنی کہانیوں کو اچھے انداز میں پیش کرنے کا موقع فراہم کیا.

میم نے ہمیں تین موضوع دیے اور میرا آج کا موضوع ہے درخت. میں درختوں کے فائدے اور نقصانات کے بارے میں بات نہیں کروں گی یقینا آپ سب نے درختوں کے بے شمار فائدے سنے ہوں گے۔ پھل دار درختوں کے بھی اور وہ درخت جن پر پھل نہیں لگتا لیکن پھول لگتے ہیں. رنگ برنگے خوشبودار پھول جو ہمارے گھروں کی خوبصورتی کو بڑھاتے ہیں اور شادی ہو یا کوئی بھی فنکشن ہو یقینا پھولوں سے ڈیکوریشن بہت اچھی ہوتی ہے اور ہمارے فنکشن کو یہ پھول چار چاند لگا دیتے ہیں.

اور ایک مزے کی بات بتاؤں کہ پھول درختوں پر نہیں پودوں پر لگتے ہیں اپنی اس غلطی کی میں معذرت چاہتی ہوں😂 یقینا آپ سب نے بھی غور نہیں کیا ہوگا.

یہ موضوع درختوں کے بارے میں ہے تو ہم واپس اپنے موضوع پر آتے ہیں. آج میں بات کرنے لگی ہوں ایسے درخت کی جو کہ ہماری زمین میں لگا ھوا ہے.

کیا آپ امیجن کر سکتے ہیں کہ جب یہ درخت ہرا بھرا ہوگا تو یہ دکھنے میں کیسا لگتا ہوگا. اس کی خوبصورتی شاید ہی میں اپنے الفاظوں میں بیان کر سکوں. یہ دور سے ہی لوگوں کو اپنی طرف متوجہ کر لیتا ہے ایسا نہیں ہے کہ اس کے آس پاس اور کوئی درخت نہیں ہے بہت سارے درخت ہیں لیکن اس جیسا اور کوئی نہیں ہے.

دیکھنے میں یہ ایسے لگتا ہے جیسے اس کی شاخیں آسمان کو چھو رہی ہیں اور اس درخت نے ہماری زمین کو اپنی شاخوں سے ایسے چھپایا ہوا ہے جیسے ایک ماں اپنے بچوں کو دنیا کے سرد گرم سے محفوظ رکھتی ہے اور ایک عظیم باپ کی طرح جو کسی کی بری نظر اپنے اہل و عیال پر پڑنے نہیں دیتا.
ایک ہیبت تھی اس درخت کی، جو واقعی ہی کسی ایسے شخص کو ہماری زمین میں داخل ہونے نہیں دیتا تھا جو بری نیت اور برے ارادے سے داخل ہو۔ ہماری زمین میں ہم مختلف قسم کی سبزیاں بھی لگاتے ہیں اور جانوروں کے لیے گھاس (چارہ) بھی لگاتے ہیں کیونکہ ہماری ایک حویلی ہے جہاں ہماری گائیں اور بھینسیں بھی ہیں اور ان کا چارہ ہماری ہی زمین پر تیار ہوتا ہے اس کے علاوہ جامن کا درخت، امرود اور آم کے درخت بھی ہیں جن کی دیکھ بھال ہمارے دادا اور ان کے چاروں بچے کرتے تھے اور جب کام سے تھک جاتے تھے تو وہ اسی درخت کے سائے میں آرام کرتے تھے اس درخت کی چھاؤں میں بہت سکون ملتا تھا آس پاس کے کسان بھی اسی درخت کے سائے میں آ کر آرام کرتے تھے اس درخت کی چھاؤں میں ایک نلکا بھی ہے جس کا پانی پی کے انسان تر و تازہ ہو جاتا ہے.

آج میں آپ کو اس درخت کی ایسی حقیقت بتاؤں گی شاید آپ اس پر یقین کریں یا نہ کریں یا آپ اس کو ایک کہانی سمجھیں لیکن یہ ایک حقیقت ہے
میرے چاچو مرحوم جو اب اس دنیا میں نہیں ہے اللہ پاک انہیں جنت الفردوس میں اعلی مقام عطا فرمائے آمین انہوں نے اپنی آنکھوں سے ایک ایسا خوبصورت منظر دیکھا تھا ایک روشنی یا آپ اسے نور کہہ لیں جو پلک جھپکتے ہی اس درخت کے اندر چلا جاتا ہے یہ منظر دیکھ کے وہ ڈر گئے تھے کیونکہ رات کا وقت تھا اور اس کے بعد وہ کچھ عرصے بیمار بھی رہے پھر انہوں نے ایک خواب دیکھا اور خواب میں ایک نیک بزرگ کا دیدار ہوا تھا. ایک دم سے وہ نیک بزرگ نور میں بدل جاتے ہیں وہی نور جیسی روشنی جو انہوں نے حقیقت میں بھی دیکھی تھی ایک دم سے وہی نور جیسی روشنی درخت کے اندر چلی جاتی ہے اور میرے چاچو کی آنکھ کھل جاتی ہے. اس نیک بزرگ نے اپنے دیدار کے ساتھ ساتھ ایک بات بھی میرے چاچو سے کہی تھی. جو انھوں نے کسی کو نہیں بتائی ۔ میرے چاچو نے ڈیٹیل میں اپنا خواب کسی کو نہیں سنایا تھا جیسے کوئی راز تھا جو وہ اپنے ساتھ ہی اس دنیا سے لے کر چلے گئے تھے لیکن اتنا کنفرم ہو گیا تھا کہ اس درخت پہ ایک نیک بزرگ رہتے ہیں میرے چاچو کے علاوہ ایک اور شخص نے اس بات کی گواہی دی تھی جو کہ ہمارا ملازم تھا وہ ہماری زمین پر کام کرتا تھا رات کے وقت اس نے بھی یہی منظر دیکھا تھا.

پھر وہاں میرے چاچو نے نماز پڑھنے کا اہتمام کیا تھا اور پورے سال میں وہ ایک دفعہ چاولوں کی دیگیں ضرور پکاتے تھے اور اس جگہ اس درخت کے سائے تلے غریبوں کو اور ہمارے رشتے داروں کو سب کو بلا کر کھانا کھلاتے تھے
چاچو کی وفات کے بعد ہم سے یہ غفلت ہوئی کہ اس طرف کسی نے دھیان نہیں دیا اور آہستہ آہستہ اس درخت نے اپنی خوبصورتی کھو دی سارے پتے جھڑتے گئے اور یہ درخت اپنے پورے قد سمیت شاخوں اور ٹہنیوں کا ڈھانچہ بن گیا.
لیکن اس کے باوجود اس کی ہیبت اب بھی برقرار ہے میری نظر میں یہ اب بھی بہت ہی خوبصورت ہے. اتنی آندھیاں آئی، اتنے زیادہ طوفان آئے، لیکن یہ درخت ماشاءاللہ پہلے دن کی طرح آسمان کو چھوتی ٹہنیوں کے ساتھ اپنی پوری آب و تاب کے ساتھ اب بھی موجود ہے.

اب میرے دوسرے چاچو اس درخت کی اور اس کے آس پاس جگہ کی حفاظت کرتے ہیں. نماز کے لیے ایک خوبصورت جگہ کا انتظام کیا ہوا ہے جو کہ بہت ہی خوبصورت نظارہ ہے. جہاں پر نماز اور نوافل ادا کرنے کے بعد جو بھی اللہ سے سچے دل سے اپنے جائز کام کے لیے دعا کرتا ہے تو اللہ تعالی سب کی جائز دعائیں قبول فرماتا ہے.

میں نے خود بھی آزمایا ہے میرے ایک ناممکن کام کو اللہ پاک نے ممکن بنا دیا تھا اللہ نے اس جگہ پر بہت ہی زیادہ برکت رکھی ہے اب میرے شوہر بھی اس جگہ پر غریبوں کو کھانا کھلاتے ہیں چاولوں کی دیگیں پکاتے ہیں اور غریبوں کو اور ہمارے گاؤں کے بچوں کو اور ہمارے سب رشتے داروں کو بلا کر وہاں پہ کھانا کھلاتے ہیں.

میں اللہ پاک سے دعا کرتی ہوں اور مجھے پوری امید ہے کہ یہ درخت دوبارہ اپنی خوبصورتی کے ساتھ ہرے بھرے پتوں سے بھر جائے گا.

میں پہلے ہی معذرت کرنا چاہوں گی اگر کسی کو میری پوسٹ کرنے کا طریقہ پسند نہ آیا ہو کیونکہ آج کل کا دور ایسا ہے کہ بہت کم لوگ ایسی باتوں پہ یقین کرتے ہیں. زیادہ تر لوگ ایسی باتوں کو جھوٹ مانتے ہیں کیونکہ سب کا اپنا اپنا نظریہ ہوتا ہے.

آج کی پوسٹ کا اختتام میں بہت اچھے الفاظوں سے کرنا چاہوں گی
حضرت علی رضی اللہ عنہ نے فرمایا ہے:
"اچھے کے ساتھ اچھے رہو لیکن برے کے لیے برے مت بنو کیونکہ تم پانی سے خون صاف کر سکتے ہو خون سے خون نہیں".

Cc: @disconnect, @jyoti-thelight, @deepak94.

Now I would like to invite my friends:
@aminasafdar @stef1 @fannyescobar @dove11 @abdullhahsafdar