12th Man(2022)

නිවාඩු දවසේ ගෙදර ඉන්න නිසා ඊයෙත් ෆිල්ම් එකක් බලන්න පුලුවන් වුනා මට. ඉතින් ඒක ගැන නොලියා ඉන්නම බැරි වුනා. මොකද හුග දවසකින් බලන්න පුලුවන් වුන හොද මලයාලම් තිලර් ෆිල්ම් එකක් නිසා මේක.

අපි හැමෝම දන්නවනේ මලයාලම් කැටගරිය කිව්වාම අනෙත් කැටගරි වලට වඩා හැමතිස්සෙම අමුතු දෙයක් ඒ ෆිල්ම් ඇතුලේ තියෙනවා කියලා. ඒවගේ රසය සමහර වෙලාවට වචනයෙන් කියන්න බැරි තරම්. මේ ෆිල්ම් එකත් කුතුහලයෙන් පිරුණු අමුතුම කතාවක් කියලා කියන්න පුලුවන්.

ඉතිං ෆිල්ම් එකේ නම තමයි 12th Man. 2022 මැයි 20 වෙනිදා නිකුත් වුන මේ චිත්‍රපටිය මේ වන විට IMDB 7/10 අගයක් ලබාගැනිමට සමත් වෙලා තියෙනවා. මේ චිත්‍රපටියේ ප්‍රධාන චරිතය නිරූපණය කරන්නේ මලයාලම් සිනමාවේ අති දක්ෂ නලුවෙක් වෙන මොහාන් ලාල්. ඒ වගේම තමයි මේ ෆිල්ම් එක අධ්‍යක්ෂණය කරලා තියෙන්නේ ජේතු ජෝසප් විසින්. මීට පෙර ජේතු ජෝසප් සහ මොහාන් ලාල් දෙදෙනාගේ එකතුවෙන් තිරගත වුන ජනප්‍රිය චිත්‍රපටි කිහිපයක්ම තියෙනවා. ඒ අතරින් ලෝකය පුරාම ඉතාමත් ජනප්‍රිය වුන Drishyam පළමු සහ දෙවන කොටස් දෙක මොවුන් දෙදෙනාගේ එකතුවෙන් සෑදුණු කතාවක්. ඒ වගේම තමයි RAM නම් ඉන්දීය රුපියල් කෝටි 30කට අධික මුදලක් වියදම් කරමින් මලයාලම් සිනමාවේ අති දැවැන්තම මලයාලම් තිලර් චිත්‍රපටිය 2023 වසරේදි සිනමාශාලා වල තිරගත වීමට නියමිතව තිබෙනවා. එම චිත්‍රපටියත් මොවුන් දෙදෙනාගේ එකතුවක්.

ඉතිං ෆිල්ම් එක පැත්තට ගියොත් මේ ෆිල්ම් එක පුරාම තියෙන්නේ පැය 24ක් පුරාවට මිතුරන් එකොළොස් දෙනෙක් මුහුණ දෙන එක්තරා සිදුවීම් මාලාවක් ගැනයි. පාසල් කාලයේ සිටම හොද මිතුරන් වුන එකොළොස් දෙනෙක් ට්‍රිප් එකක් යනවා. ඒ ට්‍රිප් එකේ රාත්‍රි සාදය අතර තුර මෙයාලා එක්තරා ගේම් එකක් කරනවා. මේ ගේම් එක නිසා හැමෝගෙම එක එක රහස් එලියට එනවා. ඒ ගේම් එකෙන් පස්සේ ඒ කණ්ඩායමේ එක ගැහැණු කෙනෙක් අභිරහස් ලෙස මරණයට පත් වෙනවා. එතන ඉදන් තමයි මේ කතාවේ හොදම කොටස් ටික පටන් ගන්නේ.

මේ කණ්ඩායමට අහම්බෙන් එකතුවුන DYSP චන්ද්‍රසේකර් තමයි මේ අභිරහස විසඳන 12 වෙනි පුද්ගලයා වෙන්නේ. එකින් එක ගැටලු විසදමින් හරි අපුරුවට අභිරහස් මරණයක සුලමුල හොයාගන්න පොලිස් නිලධාරියෙකුගේ කතාවක් ඔයාලට මේ 12th Man චිත්‍රපටිය හරහා නරඹන්න පුලුවන්.