حكايات

عمرك لا تحرق مراحل حياتك.. عيشها بكل الي فيها ..بالخايب و الباهي ..بدمعتها و فرحتها ..بغصتها و ضحكتها ..في لحظة الضعف و لحظة القوه ..خاتر عمرك لا تنجم تطلع للجبل منغير ما تتعدا من شلالو اسرارو و خبابلو..من غابتو بكلها ..في اللحظه الي وصلت فيها للدنيا موش بالساهل يولي عندك خدمه و دار ..خاتر لازمك تقرا و تصبر...
ربي سبحانوا ساعات يمتحن عبدوا باش يعرف قوة ايمانو بيه و صدقوا في افعالوا ...وقتها انتي ولا غيرك لازم تعرف الي هي فرصه.. فرصه مالازمكش تسلم فيها و بيها تثبت برشا حاجات و تصبر و تصبر و تصبر و تعرف حتى كان طحت راك باش تقوم و كان دعثرت راك باش تقوم و من جديد و تكمل طريقك باش توصل لما خير و لين ربي يفرجها عليك.
ناس بكري كانوا يحكيولنا برشا حكايات و احنا صغار اما ما عرفناش نتعلمو العبره الي فيها.
كيف قصة سيدنا يونس الي صبر و عانا في ثلاثه ظلومات ..لولا في بطن الحوت و الثانيه في البحر و الثالثه ظلام الليل و بعد هذا الكل و بعد صبرو و قوة ايمانوا خرج و انتي... ايه انتي اش ناقصك تعرف هذا الكل و مازلت يائس..باش تقلي و جيعه و كل ..سيدنا يوسف عليه السلام تغدر من اقرب الناس ليه من خواتوا الاعزاز عليه رماوه في البير بلا لا شفقه ولا رحمه و بعد خذا من اعلى المراتب موش كان في الدنيا حتى في الاخره.
هات نعطيك ملخص لكلامي انا ما جيتش باش نعمل فيها عالمه و كل لا بالعكس انا حبيت نوصلك معلومه يمكن تغيرلك برشا من حياتك ولا حياة غيرك هاك علاش.
الحياة تجارب..امتحان..درس..سباق..كيف ما تحب سميها و على هواك انتي اما لازمك تعرف كيفاش تخرج العبره الي فيها و تتعلم الي صبر لقا الكنز الي فيه ولي سلم راهوا طيح النور الي بين يديه.