Nap boukannen dlo

Anpil kote nou pase n tande moun ap di « map bat dlo pou m fè bè ». Sa se yon pwovèb kreyol ki tradwi mizè ak enkapasite anpil moun.
Nan bat dlo pou fè bè, anpil moun rive fè ledikasyon pitit yo, yo rive peye kay pou yo rete, yo rive kouvri frè lopital lè gen maladi, fè depans lè gen lanmo elatriye.
Jodi a m fè yon lot konsta : edikasyon timoun yo pa byen fèt, gen gwo pwoblèm sante ki toujou ap trakase moun nan kat kwen peyi a, anpil moun paka manje. Rezon ! se paske yo ap bat dlo pou fè bè.
Fas a enkapasite moun yo, se komsi yo ta mande yo pou rann tout sa ki enposib pousib, nou rele sa « boukannen dlo ». Nan boukannen dlo nou ka imajine sa kap pase ? alafen nou ka reyalize ke n pa gen dife anko paske dlo a ap etenn li. E dlo sa ap dipasrèt, donk nou ap lage san anyen nan men nou.
Sa mande anpil konsyans pou nou repanse bagay yo, sa mande yon lot mantalite pou sa ki pi gwo yo sipote sa ki pi piti yo, sa mande gwo jefo pou nou aprann pataje riches, konesans ak tout kalite savwa pou sosyete a bouje.
Nou dwe soti nan « bat dlo pou fè bè » nou dwe bani kesyon « boukennen an dlo a » Bagay sa yo enjis pou yon sosyete ki vle bouje.